काठमाडौं- मलेशियाका पूर्व उपप्रधानमन्त्री डाक्टर अहमद जाहिद हमिदीविरुद्ध विदेशी नागरिकलाई उपलब्ध गराइने भिसा प्रणालीमा भ्रष्टाचार गरेको अभियोगमा मुद्दा दर्ता हुने भएको छ ।

मलेशियाको भ्रष्टाचारविरुद्धको आयोगले डाक्टर हमिदीविरुद्ध बुधबार (भोलि) अभियोग दर्ता गराउनका लागि महान्यायाधिवक्ताको कार्यालयबाट अनुमति लिइ सकेको मलेसियाको सञ्चारमाध्यम द स्टारले जनाएको छ ।

मलेशियाको भ्रष्टाचारविरुद्धको आयोगले मंगलबार जारी गरेको विज्ञप्तिमा डाक्टर हमिदीविरुद्ध राजधानी क्वालालम्पुरस्थित सेसन्स कोर्टमा बुधबार र शाह आलम सेसन्स कोर्टमा बिहीबार मुद्दा दर्ता गराउने तयारी गरेको छ । यसअघि उनलाई सोमबार गिरफ्तार गरिएको र पछि जमानतमा रिहा गरिएको समेत द स्टारले जनाएको छ ।

मलेसिया सरकारले पछिल्लो समय मलेसिया रोजगारीमा जाने कामदारमाथि आर्थिक भार थप्दै आएका संस्था बन्द गर्ने प्रक्रिया थालेको छ ।