काठमाडौं – चलचित्र ‘दाल भात तरकारी’ ले राजधानीका केही सिङ्गल थिएटर हलमा ५१ औँ दिन मनाउन सफल भयो । फिल्ममा हरिवंश आचार्य, मदनकृष्ण श्रेष्ठ निरुता सिंह, बसुन्धरा भुसाल, पुष्प खड्का, आँचल शर्मा, वर्षा राउत लगायका कलाकारको शीर्ष भूमिका थियो ।

समीक्षात्मक रुपमा मिश्रित टिप्पणीका बावजूद यो कमेडी फिल्मले ५१ औँ दिन मनाएपछि कलाकारले खुशी साटेका छन् ।

फिल्ममा पुष्प खड्का र आँचल शर्माले जोडीका रुपमा देखिएका छन् । फिल्मले ५१ औँ दिन मनाएको खुशी साट्ने क्रममा नायिका आँचल शर्माले नेपाली फिल्म नचलिरहेको अवस्थामा फिल्मले गरेको व्यापारले आफूलाई निकै खुशी दिएको बताइन् ।

‘जस्तो जे गाली खाएर भए पनि, राम्रो नराम्रो, नुन पुगेको लगायतका टिप्पणी आउँदा ५१ दिन मनाएकोमा हामीलाई खुशी लागेको छ, फिल्मले ५१ औँ दिन मनाउनु भनेको हाम्रो लागि उर्जा पनि हो,’ आँचलले भनिन् ।

यसअघि आँचल अभिनित फिल्म ‘शत्रु गते’ ले पनि केही सिनेमा घरमा ५१ दिन मनाउन सफल भएको थियो । यता ‘दाल भात तरकारी’ ले ५१ औँ दिन मनाएपछि आँचल थप मख्ख छिन् ।