काठमाडौं- सन् २०२६ को विन्टर ओलम्पिक र पारालम्पिक आयोजनाको जिम्मा इटालीले पाएको छ । प्रतियोगिता इटालीका दुई ठूला शहर मिलान र कोर्टिनामा आयोजना हुनेछ ।

अन्तर्राष्ट्रिय ओलम्पिक कमिटी (आईओसी) मा भएको मतदानमा इटालीका यी दुई शहरले बाजी मारेका हुन् । विन्टर ओलम्पिक २०२६ फेब्रुअरी ६ देखि २२ सम्म चल्नेछ भने विन्टर पारालम्पिक मार्च ६ देखि १५ सम्म चल्नेछ । कोर्टिनाले यसअघि पनि एक संस्करणको विन्टर ओलम्पिकको आयोजना गरिसकेको छ । कोर्टिनामा सन् १९५६ मा ओलम्पिकको आयोजना भएको थियो ।

मतदानमा कूल ८२ भोट खसेकोमा मिलान र कोर्टिनाले ४७ मत पाएका थिए । विन्टर ओलम्पिक र पारालम्पिक आयोजनाको जिम्मा पाएकोमा आईओसी अध्यक्ष थोमस बाखले मिलान र कोर्टिनलाई बधाई दिए । ‘हामी एक पुरानो शीतकालीन खेलको देशमा एक उत्कृष्ट र टिकाउ खेलका लागि तयार छौ । प्रशंसकहरुको ज्ञानको सोख, अनुभव र सञ्चालक मिलेर संसारको सर्वश्रेष्ठ एथलेटिकको सहि माहोल बन्नेछ ।’ उनले भने ।