पेरु– ल्याटिन अमेरिकी मुलुक पेरुको सुनखानीमा बन्दुकधारीले गोली हानी ७ जनाको हत्या गरेका छन् । दक्षिणी पेरुको एण्डिज पर्वतमालामा रहेको ला रिकोनाडा सुनखानी क्षेत्रमा सुरुङ्गभित्र बन्दुकधारीले ७ कामदारको हत्या गरेको पेरुका अधिकारीले जनाएका छन् ।

हत्या गरिएका कामदारका कन्चटमा गोली लागेका अवस्थामा शव फेला पारिएको र घटनाबारे अनुसन्धान शुरु गरिएको प्रहरीले जनाएको छ । कामदारको गोली हानी हत्या गरिनुको कारण तथा घटनामा संलग्न रहेकाहरुको पहिचान हुन नसकेको प्रहरीको भनाइ छ ।

दक्षिणी पेरुको सो क्षेत्रमा धेरै अवैधानिक सुनखानी रहेको र त्यहाँ काम गर्ने वातावरण तथा श्रमिकको अवस्था निकै नै दयनीय हुने गरेको प्रतिवेदन सार्वजनिक हुने गरेको छ ।

पेरु दक्षिण अमेरिकाको सबैभन्दा ठूलो सुन निर्यातकर्ता मुलुक हो ।