मुम्बई– बलिउड सुपरस्टार सलमान खानविरुद्ध मुम्बईको एक प्रहरी चौकीमा फ्यानले उजुरी दर्ता गरेका छन् । उजुरीमा उनले सलमान खानले फोन खोसेको कारण उजुरी हालेको बताएका छन् ।

यो मामिलामा सलमान खानको सेक्युगार्डले पनि प्रहरीमा अर्को उजुरी दर्ता गरेका छन् । जसमा सलमानको अनुमतिविना उनको पिछा गरेको र भिडियो खिचेको आरोप लगाइएको छ ।

खासमा सलमान खान जुहूदेखि कांदिवलीमा साइकलमा यात्रा गरिरहेका थिए । त्यो क्षणलाई एक युवकले मोबाइलमा भिडियो खिचेका थिए । ती युवकले झण्डै २० मिनेटसम्म सलमानको भिडियो बनाइरहे ।

त्यसपछि सलमान खान भड्किए । उजुरीमा आरोप लगाइएको छ कि, सलमान खानले मोबाइल खोसे । पछि उनका सुरक्षा सहयोगीले मोबाइल फिर्ता गरे ।

यो सबै भएपछि ती युवक प्रहरी चौकी पुगेर सलमान विरुद्ध उजुरी हाले । उजुरीमा सलमान खानलाई उचित कारवाहीको माग पनि गरिएको छ ।