काठमाडौं– तत्कालीन जिल्ला वन कार्यालय डोल्पाका कर्मचारीले जडिबुटी निकासीमा अनियमितता गरेको भन्दै विशेष अदालतमा भ्रष्टाचार मुद्दा दायर भएको छ ।

जिल्ला वन कार्यालयका कर्मचारीहरुले स्थानीय जग्गा धनी तथा जडिबुटी ठेकेदारसँगको मिलेमतोमा डेढ करोड रुपैयाँ बराबरको अनियमितता गरेको अख्तियार दुरुपयोग अनुसन्धान आयोगको छानबिनबाट पत्ता लागेको छ ।

तत्कालीन जिल्ला वन अधिकृत राम तिवारी ठाकुरसहितले निजी हकभोगको जग्गाबाट जडिबुटी संकलन गरेको भनी नक्कली छुटपूर्जी बनाएर राष्ट्रिय वनबाट संकलन गरिएको जटामसी बाहिरी जिल्ला निकासी गरेका थिए ।

जिल्ला वन अधिकृत ठाकुरसहितको मिलेमतोमा १ लाख ८५ हजार ९ सय ९६ किलो जटामसी नक्कली छुटपूर्जी बनाएर जिल्ला बाहिर निकासी गरिएको थियो । अख्तियारका अनुसार उक्त जटामसीको मूल्य १ करोड ४८ लाख ६९ हजार ६ सय ८० रुपैयाँ बराबरको हुन आउँछ ।

अख्तियारले तत्कालीन जिल्ला वन अधिकृत ठाकुर, फरेस्टर रुद्र बहादुर बुढा तथा भीम बहादुर बुढाविरुद्ध जनही १ करोड ४८ लाख ६९ हजार ६ सय ८० रुपैयाँ बिगो, जरिवाना र कैद सजाय माग गर्दै सोमबार विशेष अदालतमा मुद्दा दायर गरेको हो ।