महेन्द्रनगर– निर्मला पन्त हत्यासँग सम्बन्धित प्रमाण नस्ट गरेको तथा यातना दिएको अभियोग लागेका प्रहरीको केन्द्रीय अनुसन्धान ब्यूरो (सिआईबी)का तत्कालीन डिएसपी अंगुर जिसी सोमबार कञ्चनपुर जिल्ला अदालतमा हाजिर भएका छन् ।

निर्मलाकी आमा दूर्गादेवीले प्रमाण नस्ट गरेको तथा निर्मलाको बलात्कार पछि हत्या आरोपमा पक्राउ परेर छुटेका दिलीपसिंह विष्टका दाजु खड्गसिंह विष्टले यातना दिएको आरोपमा उजुरी दिएका थिए । निलम्बित डिएसपी जिसीसहित ८ जना तत्कालीन प्रहरी अधिकारी÷कर्मचारीविरुद्ध मुद्दा दर्ता भएकोमा अन्य ७ जना भने धरौटीमा रिहा भइसकेका छन् ।

जिल्ला अदालत कञ्चनपुरले फागुन २६ गते जिसीविरुद्ध अदालतमा हाजिर हुन ३५ दिने सूचना जारी गरेको थियो । जिसी सूचना जारी भएको १६ औं दिन सोमबार अदालतमा उपस्थित भएका हुन् ।

जिसी अदालतमा हाजिर भएसँगै उनको बयान लिने काम शुरु भएको जिल्ला अदालत कञ्चनपुरका श्रेष्तेदार हरिकृष्ण अवस्थीले जानकारी दिए ।

सोमबार बयान सकिए थुनछेक बहस हुनेछ । श्रेष्तेदार अवस्थीका अनुसार बयान सकिएर आदेश नआउन्जेलसम्म जिसी हिरासतमा रहनेछन् ।