काठमाडौं – दर्शन गुरुङ र विदेशी खेलाडी जुनियर अनगुइने निकेनगुवाको गोलमा न्यू रोड टिम एनआरटीले सहिद स्मारक ए डिभिजन लिगमा पहिलो जित हात पारेको छ ।

जीतसँगै एनआरटीले लिगको अंक तालिकामा स्पष्ट ३ अंक जोडेको छ ।

च्यासल युथ क्लबलाई २-१ गोलले पराजित गर्दै एनआरटीले अंक तालिकामा खाता खोलेको हो ।

एनआरटीका दर्शन गुरुङले खेलको ८६ औं मिनेटमा च्यासलका दुई डिफेन्डरलाई बिट गर्दै गोल गरेका थिए । च्यासलका लागि अतिरिक्त समयमा अमिर श्रेष्ठले एक गोल फर्काएका थिए ।

दशरथ रंगशालामा बुधबार दिउँसो भएको खेलमा एनआरटीका लागि खेलको २४ औं मिनेटमा एरिक बिष्टको पासलाई सदुपयोग गर्दै निकेनगुवाले टोलीलाई अग्रता दिलाएका थिए ।

खेलको ७२ औं मिनेटमा एनआरटीका जोर्डन जेआरले च्यासलका सञ्जय राजबागलाई लडाएपछि दुई पहेंलो कार्ड पाउँदै मैदानबाट बाहिरिएका थिए ।

एनआरटीले ३ खेलमा ४ अंक बनाउँदा पराजित च्यासलको पनि ४ अंक रहेको छ।