काठमाडौं – १३ औं दक्षिण एसियाली खेलकुद (साग) अन्तरगत पुरुष फुटबलमा भारत सहभागी नहुने भएको छ ।

भारतले पुरुष फुटबलमा भाग नलिनेबारे नेपाल ओलम्पिक कमिटीलाई जानकारी गराएको छ ।

भारतले खेलाडी दर्ता गर्नेक्रममा महिला फुटबलरको मात्रै दर्ता गराएपछि नेपाल ओलम्पिक कमिटीले सोधेको प्रश्नमा भारतबाट ‘पुरुष फुटबल नखेल्ने’ जवाफ आएको एनओसीले जानकारी दिएको छ ।

सागका लागि गएको शुक्रबार अखिल नेपाल फुटबल संघ (एन्फा) ले ‘ड्र’ गरिसकेको थियो । जसमा नेपाल र भारत दुई फरक समूहमा रहेका थिए । तर, अब सागमा ५ टोलीमात्रै सहभागी हुनेछन् ।

जसमा समूह ए मा नेपाल बंगलादेश र भुटान थिए भने समूह बि मा भारत, माल्दिभ्स र श्रीलंका परेका थिए ।

सागका लागि फेरि पुरुष फुटबलतर्फ पुन टाई सिट ‘ड्र’ हुनेछ । पाकिस्तान यसअघि नै नआउने निश्चित भइसकेको अवस्थामा भारतले पनि नखेल्दा अब नियमत : सागका खेल राउण्ड रोविन लिगका आधारमा हुने नेपाली फुटबल विश्लेषक सञ्जीव मिश्र बताउँछन् ।

योसँगै लिगका शीर्ष दुई टोली सागको फाइनलमा पुग्नेछन् ।