काठमाडौं– नेपाली क्रिकेट टोलीका निवर्तमान कप्तान पारस खड्काले पहिलो पटक अन्तर्राष्ट्रिय लिग खेल्ने भएका छन् ।

विहीबार राति आबुधाबी टिमले पारस खड्कालाई टी–१० लिगका लागि १० हजार अमेरिकी डलरमा आफ्नो टोलीमा आवद्ध गरेको हो । टोलीमा आवद्ध भएसँगै पारसले दोस्रो संस्करणको टी–१० लिग खेल्नेछन् । आबुधावी टोलीको कप्तानमा इङ्ल्यान्डका मोइन अलि रहेका छन्।

पारस नेपालका अलराउण्डर खेलाडी हुन् । खड्काले टि–२० र एकदिवसीय क्रिकेटमा शतक बनाएका छन् । नेपाली खेलाडीहरुमा खड्काले टी–२० मा सर्वाधिक रन बनाएका छन् ।

टोलीमा आवद्ध भएसँगै पारस नेपालबाट विदेशी लिग खेल्ने तेस्रो खेलाडी बनेका छन् ।  यसअघि लेग स्पिनर सन्दीप लामिछाने र तीव्र गतिका बलर सोमपाल कामीले विदेशी लिग खेलिसकेका छन् । टी-१० लिगको पहिलो संस्करणमा नेपाली खेलाडी सन्दीप सामेल थिए । सन्दीप यो संस्करणमा कर्नाटक टस्कबाट खेल्नेछन् ।