काठमाडौं– काठमाडौंमा जारी यु–१८ साफ च्याम्पियनसिप फुटबल प्रतियोतामा नेपाल समूह चरणबाटै बाहिरिएको छ । समूह ‘ए’बाट माल्दिभ्स र भुटान सेमिफाइनलमा पुगेका छन् ।  मंगलबार भएको भुटान र माल्दिभ्सबीचको खेल गोलरहित बराबरी सकिएको छ ।

दुई टोलीले बराबरी खेलेपछि ४ अंक भएको भुटान समूह ए को विजेता २ अंक भएको माल्दिभ्स उपविजेता बन्दै सेमिफाइनल पुग्दा घरेलु टोली नेपाल भने प्रतियोगिताबाटै बाहिरिएको हो ।

समूह चरणको पहिलो खेलामा नेपालले माल्दिभ्ससँग १–१ गोलको बराबरी गरेकाे थियो । दोस्रो खेलमा भुटानसँग भने ३–० गोल अन्तरले पराजित भएको थियो ।

भुटानसँग पराजित भएपछि नेपालको अघिल्लाे चरणमा प्रवेश गर्ने सम्भावना कमजोर भएको थियो । तर, मंगलबार माल्दिभ्स र भुटानले बराबरी खेलेसँगै नेपाल स्वतः प्रतियोगिताबाट बाहिरिएको हो ।

लगातार दुई संस्करणको विजेता नेपाल तेस्रो संस्करणमा समूह चरणबाटै बाहिरिन पुगेको हो ।