काठमाडौं– यातायात व्यवस्था विभागले दशैंका लागि आवागमन सहज बनाउन भन्दै सार्वजनिक यातायातका साधनले १ साताका लागि रुट परमिट लिनु नपर्ने व्यवस्था गरेको छ ।

विभागले असोज १२ देखि १९ गतेसम्मका लागि रुट परमिट विनै देशको जुनसुकै ठाउँमा पनि सार्वजनिक यातायातका साधन सञ्चालन गर्न पाउने व्यवस्था गरेको हो ।

नियमित अवस्थामा भने रुट परमिट प्राप्त बाटोमा मात्रै सार्वजनिक सवारीका साधन सञ्चालन गर्न पाइन्छ ।

रुट परमिट फ्रि भएसँगै सार्वजनिक यातायातका साधनहरु यात्रुको चापअनुसार सञ्चालन हुन पाउने यातायात व्यवस्था विभागका महानिर्देशक गोगन बहादुर हमालले जानकारी दिए ।

‘नियमित अवस्थामा सार्वजनिक यातायातका साधनले रुट परमिट लिएको क्षेत्रमा मात्रै आफ्नो सेवा प्रदान गर्न पाउँछन्,’ हमालले भने, ‘दशैंमा यात्रुको चापलाई मध्यनजर गर्दै सार्वजनिक यातायातका साधनको रुट परिमिट फ्रि गरिउको हो । असोज १२ देखि १९ गतेसम्म कालो नम्बर प्लेट भएका सवारीसाधनहरु यात्रुको चापअनुसार जुनसुकै ठाउँमा पनि चल्न सक्छन् ।’