काठमाडौं –चौथो अन्तर विश्वविद्यालय राष्ट्रिय खेलकुद प्रतियोगिता आगामी बिहीबारबाट सुरु हुने भएको छ । राष्ट्रिय खेलकुद परिषद्को आयोजना तथा राष्ट्रिय विश्वविद्यालय खेलकुद संघको व्यवस्थापनमा प्रतियोगितामा ९ विश्वविद्यालय सहभागी हुने छन् ।

काठमाडौंमा मंगलबार पत्रकार सम्मेलन गरी प्रतियोगिताबारे जानकारी दिइएको हो । प्रतियोगितामा फुटबल, भलिबल, बास्केटबल, टेबलटेनिस, ब्याडमिन्टन, चेस र दौड समावेश छन् ।

त्रिभुवन विश्वविद्यालय, मध्यपश्चिमाञ्चल, सुदूरपश्चिमाञ्चल, पोखरा, पूर्वाञ्चल, नेपाल संस्कृत, लुम्बिनी बौद्ध, कृषि तथा वनविज्ञान र काठमाडौं विश्वविद्यालयका गरी ६ सय १२ खेलाडीले विभिन्न खेलमा प्रतिस्पर्धा गर्ने बताइएको छ ।

आयोजकका अनुसार फुटबल लगनखेलस्थित नेपाली सेनाको मैदानमा हुनेछ भने भलिबल जावलाखेलस्थित भलिबल प्रशिक्षण केन्द्रमा, बास्केटबल एक्मी इन्जिनियरीङ कलेज सितापाइला, दौड आर्मीको मैदान लनखेल, चेस पिनाकल कलेज, टेबल टेनिस राष्ट्रिय टेबल टेनिस तालिम केन्द्र लैनचौर तथा ब्याडमिन्टन नेपाल पुलिस क्लब प्रदर्शनीमार्गमा हुनेछ ।

प्रतियोगितामा १ करोड २६ लाख रुपैयाँ लागत अनुमान गरिएको छ भने ६ सय १२ खेलाडी ७६ स्वर्ण, ७६ कास्य, ७६ रजत गरी कुल २ सय २८ पदकका लागि प्रतिस्पर्धा गर्नेछन् ।