काठमाडौं– प्रधानमन्त्री केपी शर्मा ओली र दक्षिण तथा दक्षिण पूर्वी एसियाका लागि अमेरिकी रक्षा उपमन्त्री डा. जो फेल्टरबीच आइतबार साँझ प्रधानमन्त्री निवास बालुवाटारमा भेटवार्ता भएको छ ।

आइतबार नै नेपाल आएका रक्षा उपमन्त्री फेल्टरसहितको अमेरिकी टोलीले प्रधानमन्त्रीसँग भेटवार्ता गरेको हो ।

भेटवार्तामा रक्षा उपमन्त्रीसहित नेपालका लागि अमेरिकी राजदूत र्‍याण्डी बेरीलगायतको पाँच सदस्यीय अमेरिकी टोलीको सहभागिता रहेको थियो भने नेपालका तर्फबाट परराष्ट्र मन्त्रालयका एक जना प्रतिनिधि पनि सहभागी थिए ।

भेटमा द्विपक्षीय हितका विषयमा छलफल भएको प्रधानमन्त्रीका परराष्ट्र सल्लाहकार राजन भट्टराईले जानकारी दिए । रक्षा उपमन्त्री फेल्टर ८ वर्षपछि अमेरिकाबाट नेपाल भ्रमण गर्ने उच्च अधिकारी हुन् ।