सोल– उत्तर कोरियाले पुनः दुई वटा छोटो दूरीको क्षेप्यास्त्र परीक्षण गरेको छ ।

दक्षिण कोरियाली सेनाले उत्तर कोरियाले क्षेप्यास्त्र परीक्षण गरेको पुष्टि गरेको हो । दक्षिण कोरियाली सेनाका अनुसार स्थानीय समयअनुसार शनिबार बिहान ६ः४५ तथा ७ः०२ बजे दक्षिण हाम्ग्योङ प्रान्तस्थित सेन्डोक सैनिक विमानस्थल नजिकैबाट परीक्षण गरिएको हो ।

पछिल्ला केही सातायता गरिएको नवौं परीक्षणका क्रममा ती क्षेप्यास्त्र ९७ किलोमिटरको उचाई लिएर ३८० किलोमिटर टाढा समुद्रमा गई खसेको जनाइएको छ । यसअनुसार पछिल्लो समय उत्तर कोरियाले परीक्षण गरेकामध्ये यी क्षेप्यास्त्र शक्तिशाली रहेको अन्तर्राष्ट्रिय सञ्चारमाध्यमले जनाएका छन् ।

अमेरिका तथा जापान र दक्षिण कोरियाले उत्तर कोरियाली क्षेप्यास्त्र परीक्षणको अध्ययन भइरहेको जनाएका छन् । दक्षिण कोरियाको सुरक्षा परिषद्ले उत्तर कोरियालाई यस्ता गतिविधि नगर्न आग्रह समेत गरेको छ ।

उत्तर कोरिया र अमेरिकाबीच आणविक निशस्त्रीकरणबारेको छलफलमा अड्चन पैदा भइरहेका बेला उत्तर कोरियाले क्षेप्यास्त्र परीक्षण गरेको हो । उत्तर कोरियाले यसअघि अमेरिका र दक्षिण कोरियाबीचको सैनिक अभ्यासको कडा शब्दमा निन्दा गरेको थियो । त्यसपछि दक्षिण कोरियाले एफ ३५ लडाकु विमानसहित अमेरिकी अत्याधुनिक हतियार खरिद गर्ने प्रक्रियाको पनि निन्दा गरेको थियो ।

उत्तर कोरियाले दक्षिण कोरियासँग कुनै किसिमको वार्ताको सम्भावना नरहेको स्पष्ट पारिसकेको छ । उत्तर कोरियाली सञ्चारमाध्यम केसीएनएले यसअघि अमेरिकी विदेशमन्त्रीको कडा शब्दमा निन्दा गर्दै अमेरिकाले चाहे आफू वार्ताका लागि तयार रहेको र यदी अमेरिका शत्रुतापूर्ण व्यवहारतर्फ अग्रसर रहेको भए त्यसका लागि पनि तयार रहेको चेतावनी दिएको थियो ।