लण्डन– बेलायती प्रधानमन्त्रीको रुपमा बोरिस जोनसनले औपचारिक रुपमा कार्यभार सम्हालेका छन् ।

बकिंघम दरबारमा पुगी महारानीसँग भेटवार्ता गरेपछि उनले औपचारिक रुपमा बेलायती प्रधानमन्त्रीको रुपमा कार्यभार सम्हालेका हुन् । प्रधानमन्त्रीको रुपमा १० डाउनिङ स्ट्रिटमा आफ्नो पहिलो सम्बोधनका क्रममा प्रधानमन्त्री जोनसनले बेलायतलाई एकीकृत बनाउन र बेलायतलाई युरोपेली युनियन ईयूबाट बाहिर ल्याउन सक्दो प्रयास गरिने जनाएका छन् । उनले बेलायत जसरी भएपनि आगामी ३१ अक्टोबरमा ईयूबाट बाहिरिने दृढता समेत व्यक्त गरेका छन् ।

चाँडै उनले सरकारका मन्त्रीहरुको कार्यभार छुट्याउने जनाइएको छ । यसअघि बुधबार नै टेरिजा मेले महारानीसमक्ष पुगेर प्रधानमन्त्रीको पदबाट औपचारिक रुपमा राजीनामा पत्र बुझाएकी थिइन् ।

जोनसनलाई मंगलबार सत्तारुढ कन्जरभेटिभ पार्टीका सदस्यहरुले आफ्नो नेता चुनेका थिए । सत्तारुढ पार्टीको नेता प्रधानमन्त्री बन्ने प्रावधान अनुसार जोनसन प्रधानमन्त्री बनेका हुन् ।