काठमाडौं– लामो समयदेखि विस्तार कार्यले गति लिन नसकेको जोरपाटी–सुन्दरीजल सडकखण्ड आगामी देशैँ पछाडिमात्रै कालोपत्रे हुने भएको छ ।
अहिले बर्षातको समय भएकाले कालोपत्रे गर्न समस्या हुने भएकाले दशैँ पछाडि भने सडक विस्तार कार्यले गति लिने उपत्यका सडक विस्तार आयोजनाले जनाएको छ ।
सडक विस्तार कार्य समयमै सम्पन्न हुन नसक्दा उक्त क्षेत्रको सडक अस्तव्यस्त बन्दै आएको छ । तत्काललाई सडकमा परेका खाल्डाखुल्डी पुर्ने तथा सामान्य मर्मत गरी यातायात आवतजावतलाई सहज बनाइने भएको छ ।
लामो समयसम्म पनि सडक विस्तार तथा निर्माणको काम सम्पन्न नहुँदा गोकर्णेश्वर नगरपालिका आफैँले उक्त सडकखण्ड बनाउने तयारी गरेपछि सडक विस्तारको जिम्मा पाएको आयोजना र नगरपालिकाबीच दशैँपछि आयोजनाले नै काम थाल्ने सहमति भएको हो ।
नगरपालिकाले निर्धारित समयमा सडक विस्तार तथा ढल मर्मत कार्य सम्पन्न नभएपछि आयोजनालाई सडक निर्माण गर्ने जिम्मा आफुलाई दिन आग्रह गर्दै आएको थियो ।
यही सोमबार दुई पक्षबीच भएको सम्झौताअनुसार आयोजनाले तत्काल काम शुरु गर्ने निर्णय गरेको गोकर्णेश्वर नगरपालिकाका मेयर सन्तोष चालिसेले खबरहबलाई जानकारी दिए ।
सडक कालोपत्रे कार्य दशैँपछि गरिने भएपनि ढल व्यवस्थापनलगायतका कार्य भने तत्काल थाल्ने गरी आयोजनाले सम्झौता गरेको मेयर चालिसेले बताए ।
उनले भने, ‘हामीले सडक विस्तारको काम आफैँ गर्छौं भन्न थालेपछि आयोजनाले नै गर्छु भन्यो, त्यसैअनुसार उसले काम थाल्ने सहमति भएको हो ।’
‘आयोजनाले दशैँअघिसम्म सडक मर्मत गर्ने र दशैँपछि कालोपत्रेको काम सुरु गर्ने छ ।’
यो पनि पढ्नुाेस्
प्रतिक्रिया