बेइजिङ– चीनले आफ्नो राष्ट्रिय सेनालाई आधुनिक, उच्च प्रविधियुक्त बनाउने गरी राष्ट्रिय प्रतिरक्षा योजना बुधबार सार्वजनिक गरेको छ ।

उक्त राष्ट्रिय सुरक्षा योजनामा परिवर्तित विश्वमा युद्धको शैलीमा नै परिवर्तन आएको र बौद्धिक युद्धकलामा प्रवेश गरेको उल्लेख छ । आर्टि्फिसियल इन्टिलिजेन्स, बिग डेटा, क्लाउड कम्प्युटिङ र नवीन तथा उच्च प्रविधियुक्त सैनिक प्रविधि आजको आवश्यकता भइसकेको उक्त योजनामा उल्लेख छ ।

योजनामा चीनको जनमुक्ति सेनाका शस्त्रलाई उच्च प्रविधियुक्त बनाइने उल्लेख छ । तथापी उक्त योजनामा चीनको सैनिक क्षमता अरु कतिपय मुलुकका सेना सरह नरहेको स्वीकार गरिएको छ ।

ताइवान स्वतन्त्रतातर्फ उन्मुख भएको भन्दै चिनियाँ राष्ट्रको एकीकरणका लागि सैनिक शक्ति प्रयोग गर्ने विकल्प अझै बन्द नभइसकेको चिनियाँ विदेशमन्त्रालयले जनाएको छ ।  उक्त स्वेतपत्रमा विश्व रणनीतिक स्थायित्वलाई नजरअन्दाज गरेको आरोप लगाउँदै ताइवानको स्वतन्त्रता विरुद्ध चेतावनी दिइएको छ ।

हालै ताइवानले अमेरिकासँग २.२ अर्ब अमेरिकी डलर बराबरको सैनिक उपकरण खरिद गरेपछि चीनको यस्तो भनाइ आएको हो । चीनले स्वतन्त्र शासन चलाइरहेको ताइवानलाई आफ्नै एक छुट्टिएको प्रान्तको रुपमा हेर्ने गरेको छ । ताइवानलाई मुख्यभूमिसँग एकीकरण गर्नका लागि चीनले सैनिक शक्ति प्रयोग गर्न समेत खुला रहेको बताउने गरेको छ ।

बेइजिङमा सार्वजनिक उक्त योजना दस्तावेजमा अमेरिकाले कोरियाली प्रायद्विपमा थाड नामक क्षेप्यास्त्र प्रतिरोधी प्रणाली जडान गरेर क्षेत्रीय सुरक्षा सन्तुलनलाई भंग गरेको समेत आरोप लगाइएको छ ।

सन् २०१२ यता पहिलो पटक सार्वजनिक गरिएको यस स्वेतपत्रमा विश्वकै सर्वाधिक ठूलो सेना र बेइजिङको सैन्य महत्वाकाँक्षाका बारेमा भने केही उल्लेख छैन ।

‘अन्तर्राष्ट्रिय रणनीतिक प्रतिस्पर्धा बढ्दो छ’ भन्दै उक्त दस्तावेजमा अमेरिकाले आफ्नो राष्ट्रिय सुरक्षा र प्रतिरक्षा रणनीतिलाई समायोजन गरेको तथा ‘एकपक्षीय नीतिहरु’ अनुशरण गरेको उल्लेख छ ।

अमेरिकाले ‘प्रमुख राष्ट्रहरुमाझ प्रतिस्पर्धालाई जबर्जस्ती बढाएको, आफ्नो प्रतिरक्षा खर्चमा वृद्धि गरेको, आणविक, बाह्य अन्तरिक्ष, साइबर र क्षेप्यास्त्र प्रतिरक्षामा थप क्षमता निर्माण गर्नेतर्फ अग्रसर भएको तथा विश्वको रणनीतिक स्थायित्वलाई बेवास्ता गरेको’ आरोप चीनको छ ।

चीन प्रतिरक्षा खर्च गर्ने मुलुकमा विश्वमै दोस्रो स्थानमा छ । अमेरिका पहिलो स्थानमा रहेको छ । चीनले सन् २०१९ मा आफ्नो सैनिक खर्चलाई ७.५ प्रतिशतले वृद्धि गर्ने घोषणा यसअघि नै गरिसकेको छ । प्रस्तावित योजनामा चीनले आफ्नो सेना विश्व शान्तिका लागि मात्र प्रयोग हुने बताएको छ ।