काठमाडौं – आईसीसी टि–२० विश्वकप छनोट एसिया फाइनलमा मलेसिया क्रिकेट टोलीले नेपाली राष्ट्रिय क्रिकेट टोलीलाई ८४ रनको विजयी लक्ष्य प्रस्तुत गरेको छ ।

सिंगापुरस्थित इन्डियन एसोसियसन ग्राउन्डमा भइरहेको खेलमा टस हारेर पहिले ब्याटिङको निम्तो पाएको मलेसियाले ९ ओभर पुरा खेल्दै ७ विकेट गुमाएर ८३ रन बनायो । बर्षाले खेल प्रभावित भएपछि खेल ९ ओभरमा झारिएको थियो ।

मलेसियाका ब्याट्सम्यानले आक्रामक खेल्दै नेपालविरुद्ध ८३ रन बनाए । मलेसियाका लागि सायद अजिजले सर्वाधिक ३० रन बनाएका थिए । उनले १५ बलको सामना गर्दै ५ चौका र १ छक्का प्रहार गरेका थिए ।

मलेसियालाई ८३ रनमा रोक्न नेपालका सोमपाल कामीले ३ विकेट लिए भने उनी सबैभन्दा महंगा पनि भए । उनले २ ओभर बलिङ गर्दै २३ रन खर्चिएर ३ विकेट लिए भने वसन्त रेग्मीले २ विकेट लिए । यस्तै, सन्दीप लामिछाने, करण केसीले समान १–१ विकेट लिए ।

नेपाल केही समयमै जवाफी ब्याटिङका लागि मैदान उत्रिदैछ । यसअघि मंगलबार भएको खेलमा नेपाल पराजित भएको थियो । भने मलेसियाले यसअघिको पहिलो खेलमा जीत हात पारेको थियो ।