काठमाडौं–नेताहरुको जिम्मेवारी बाँडफाँडका विषयमा छलफल गर्न भोलि (बिहीबार) नेपाल कम्युनिस्ट पार्टी नेकपाको सचिवालय बैठक बोलाइएको छ ।

मंगलबारका लागि बोलाइएको बैठक आन्तरिक तयारी नपुगेको, गृहकार्य बाँकी रहेको भन्दै स्थगित गरिएको थियो । आइतबार बसेको बैठकले एकता प्रक्रिया टुंगो लगाएको थियो । कार्यविभाजनलाई अन्तिम रुपम दिन मंगलबारका लागि बोलाइएको बैठक भने गृहकार्य नपुगेका कारण स्थगित गर्नुपरेको नेकपाको सचिवालयले जनाएको छ ।

बिहीबार बस्ने बैठकले विभिन्न ३२ वटा विभाग, तीन आयोग र एक सल्लाहकार समितिको जिम्मेवारी बाँडफाँड गर्ने कार्यसूची तय भएको छ । बिहीबारको बैठकमा गम्भीर रुपमा छलफल हुने बताउँदै नेकपाका प्रवक्ता नेता नारायण काजी श्रेष्ठले बाहिर चर्चा भएजस्तो जिम्मेवारीका विषयमा आधिकारिक निर्णय हुन बाँकी रहेको बताए ।

उनले भने, ‘करिबकरिब एकता प्रक्रियाका सबै कुरा टुंगोमा पुगिसकेका छन् । जिम्मेवारी पनि अन्तिमअन्तिम तिर पुगेको छ । भोलिको बैठकबाट आवश्यक निर्णय लिइन्छ । जिम्मेवारी बाँडफाँडका विषयमा भने बाहिर चलेको हल्ला जस्तो अवस्था छैन । भोलिको निर्णय नै अन्तिम हुनेछ ।’

नेताहरुको जिम्मेवारी बाँडफाँडका विषयमा अहिले पनि आन्तरिक गृहकार्यमा छन् । अनौपचारिक रुपमा कसलाई कुन जिम्मेवारी दिने भन्ने विषयमा छलफल जारी रहेको नेकपाले जनाएको छ ।