काठमाडौं– प्रतिबन्धित नेपाल कम्युनिस्ट पार्टीका महासचिव नेत्रविक्रम चन्दका छोराको प्रकाश चन्दको चौतर्फी तारिफ भएको छ । उनले गरेको कर्मका कारण तारिफ भएको हो ।

उनले केही दिन अघि कपिलवस्तुमा दुई दिने स्वास्थ्य शिविर सञ्चालन गरेका हुन् । बाबु भूमिगत भइरहेका बेला उनका छोरा प्रकाशले कपिलवस्तुस्थित शिवगढी नगरपालिका–३ भगवानपुरको नेपाल राष्ट्रिय आधारभूत विद्यालयमा स्वास्थ्य शिविर सञ्चालन गरेका हुन् ।

प्रकाशसहित १९ जना स्वास्थ्यकर्मीहरुको सहभागी रहेको शिविर अखिल नेपाल जनस्वास्थ्यकर्मी महासंघको पहलमा शहिद स्मृति प्रतिष्ठानले आयोजना गरेको हो ।

स्वास्थ्य शिविरबाट २६ सय जनाले सेवा लिएको प्रकाशले बताए । उनका अनुसार स्वास्थ्य शिविरमा स्त्री तथा प्रसुती, बालरोग, दाँतरोग, हाडजोर्नी, छाला रोग तथा यौनरोग, नाक कान घाँटी, प्रयोगशाला र भिडियो एक्सरे सेवा उपलब्ध गराइएको थियो ।