काठमाडौं – चलचित्र ‘मालिका’ का निर्माता नरबहादुर कार्कीलाई प्रहरीले पक्राउ गरेको छ । प्रतिबन्धित नेत्रविक्रम चन्द नेतृत्वको विप्लव माओवादीमा आवद्ध भएको भन्दै प्रहरीले पक्राउ गरेको हो ।

कार्कीलाई महानगरीय अपराध अनुसन्धान महाशाखा र काठमाडौं प्रहरी परिसर, टेकुको टोलीले बालुवाटारबाट पक्राउ गरेको हो ।

महाशाखाका प्रमुख सहकुलबहादुर थापाले कार्कीलाई नियन्त्रणमा लिएको जानकारी दिए । उनका अनुसार कार्कीलाई अनुसन्धानका लागि नियन्त्रणमा लिइएको हो ।

प्रहरीले कार्की केही महिनाअघि विप्लव माओवादीमा प्रवेश गरेको दाबी गरेको छ । कार्कीले नायिका रेखा थापासँग मिलेर फिल्म ‘मालिका’ निर्माण गरेका थिए । सामाजिक सञ्जालमा कार्कीले सरकारलाई लक्षित गर्दै विभिन्न स्टाटसहरु पोस्ट गर्दै आएका थिए ।