काठमाडौं– विश्वको सर्वाेच्च शिखर सगरमाथाको उचाइ नाप्न गएको सरकारी टोली फर्किएको छ । सगरमाथाको उचाइ मापन गरेर टोली बिहीवार काठमाडौं फर्किएको हो ।

टोलीलाई शुक्रबार भूमि व्यवस्था, सहकारी तथा गरीबी निवारणमन्त्री पदमा अर्यालले सिंहदरबारस्थित मन्त्रालयमै एक कार्यक्रमको आयोजना गरी स्वागत गरिन् । उनले अब ६ महिनाभित्र सगरमाथाको वास्तविक उचाई प्राप्त हुने जानकारी दिइन् ।

नेपाल सरकारले पहिलोपटक आफैंले सगरमाथाको उचाई मापन गरेको हो । यसअघि भारतले सगरमाथाको उचाइ मापन गरेको थियो जसलाई नेपाल सरकारले मान्यता दिएको थियो ।

२०७२ सालको भूकम्पपछि सगरमाथाको उचाईमाथि प्रश्न उठाउन थालेपछि सरकारले पहिलो पटक आफ्नै स्रोत र साधनमा नापी विभागमा प्रमुख नापी अधिकृत खिमलाल गौतमको नेतृत्वमा नापी विभागकै नापी अधिकृत रविन कार्की, विभागका सर्वेभर सुरजसिंह भण्डारी र अमिन युवराज धिताललाई गत चैत्र २७ गते त्यसतर्फ पठाएको थियो ।

टोलीले गत जेष्ठ ८ गते बिहान ३ गते सगरमाथाको उचाई चुमी१ घण्टा १६ मिनेट लगाएर सगरमाथाको उचाईको सर्वेक्षण गरेको हो । आरोहण चुनौतिपूर्ण भएपनि प्रधानमन्त्री ओलीको उत्साह र मन्त्री अर्यालको हौसलाका कारण आफूहरुले सगरमाथाको सफल आरोहण गरी त्यसको उचाईको सर्वेक्षण गर्न सफल भईएको टोलीका नेता प्रमुख नापी अधिकृत गौतमले बताए ।