काठमाडौं – अभिनेत्री तथा नयाँ शक्ति पार्टीकी नेत्री करिष्मा मानन्धरले आज एसईईको (आइतबार) परीक्षा दिएकी छिन् । एसईईको परीक्षा दिएपछि उनले सामाजिक सञ्जाल फेसबूकमा स्टाटस लेख्दै सहयोग र हौसला दिने सबैलाई धन्यवाद दिएकी छिन् ।

एसईईका लागि करिश्माले लामो समयदेखि तयारी गरिरहेकी थिइन् । उनको परीक्षा सेन्टर काठमाडौंको डिल्लीबजारस्थित विजय स्मारक माविमा परेको थियो । परीक्षा हल प्रवेश गर्नुअघि पत्रकारसँग कुरा गर्दै उनले आफूले राम्रै तयारी गरेको बताइन् ।

स्कूल पोशाकमा कार चढेर परीक्षा दिन पुगेकी करिश्मा केही सिरियस देखिएकी थिइन् । उनले परीक्षा दिइसकेपछि सामाजिक सञ्जाल फेसबूकमा एक पोस्ट गर्दै सपना सानो या ठूलो जस्तो भए पनि त्यो पूरा गर्न आफ्नाहरुको हौसला र साथविना सम्भव नहुने बताइन् ।

‘सपना सानो होस् या ठूलो पूरा गर्न आफ्नाहरुको हौसला र साथविना सम्भव हुँदैन,’ करिश्माले स्टाटसमा लेखेकी छिन्, ‘शुभकामना दिनुहुने मेरा परिवार र चलचित्र क्षेत्रका परिवार र सम्पूर्ण साथीहरुलाई धन्यवाद ।’

साथै उनले आफूसँग आजै एसईई दिने सबै विद्यार्थीलाई शुभकामना पनि दिएकी छिन् । उनलाई नयाँ शक्ति पार्टीका संयोजक डाक्टर बाबुराम भट्टराईले फोनमार्फत शुभकामना दिएका थिए ।