एजेन्सी— पाँच पटकको विश्वकप विजेता ब्राजिलले अन्तराष्ट्रिय मैत्रिपूर्ण खेलमा पानामासँग बराबरी खेलेको छ । शनिबार राति पानामाविरुद्धको खेलमा ब्राजिलले १—१ गोलको बराबरी खेलेको हो ।

विश्व फुटबल महासंघ फिफाको तेस्रो नम्बरको बरियतामा रहेको ब्राजिलविरुद्ध ७६ औं बरियतामा रहेको पानामाले उत्कृष्ट प्रदर्शन गर्दै बराबरी खेल्यो ।

स्टार खेलाडी नेयमार बिना मैदान उत्रिएको ब्राजिलले उनको अनुपस्थितिमा खासै राम्रो प्रदर्शन गर्न सकेन । खुट्टामा चोट लागेका कारण नेयमार अहिले आराम गरिरहेका छन् । नेयमार टिममा नहुँदा ब्राजिलले पानामासँग बराबरी खेल्नु परेको विभिन्न समाचारहरुमा उल्लेख छ ।

खेलमा सुरुआती अग्रता लिएको ब्राजिलका लागि टोलेन्टिनो कोइलहो डे लिमाले ३२ औं मिनेटमा गोल गर्दै पानामालाई पछि पारेको थिया । तर, ब्राजिलले अग्रता लिएको ४ मिनेट नबित्दै ३६ औं मिनेटमा पानामाका एडोल्फ माचाडोले गोल फर्काएपछि पानामा र ब्राजिलले पहिलो हाफमा १—१ गेल बराबरी खेलेका थिए ।

दोस्रो हाफमा ब्राजिलले पानामामाथि दबाब राखेपनि पानामाको रक्षापङ्तीलाई छिचोल्न नसक्दा खेल १–१ को बराबरीमा सकियो ।