दाङ– एसईई परीक्षा आजबाट मुलुकभर शुरु भएको छ । मुलुक संघीय संरचनामा गएपछि पहिलो पटक प्रदेश सरकारको समन्वयमा माध्यमिक शिक्षा परीक्षा (एसईई) भएको हो ।

परीक्षाको पहिलो दिन अहिले विद्यार्थीहरुले अंग्रेजी विषयको परीक्षा दिइरहेका छन् । यस पटकाको परीक्षामा प्रतिनिधिसभाकी सांसद शान्ता चौधरीसमेत सहभागी भएकी छिन् ।

पीएचडी गर्ने लक्ष्य राखेकी शान्ताले परीक्षा दिनुपूर्व आफ्नो फेसबुकमा प्रवेशपत्र सहितको तस्वीर राख्दै हर्षित मुद्रामा देखिएकी छिन् । २०७३ सालमा डाँडागाउँ मावि गोग्ली, घोराहीमा कक्षा ८ मा भर्ना भएकी चौधरीले यसपाली आफ्नी १७ वर्षीय छोरीसँगै परीक्षा दिइरहेकी छिन् ।

शान्ता चौधरी ०६४ सालको संविधानसभामा सभासद् रहेकी थिइन् भने अहिले पनि संघीय संसदअन्तर्गत प्रतिनिधिसभा सदस्य समेत रहेकी छन् । उनी सत्तारुढ दल नेपाल कम्युनिष्ट पार्टी (नेकपा)की संसदीय दलकी सचेतक समेत हुन् ।

चौधरीको ‘कमलरीदेखि सभासद्’सम्म नामक पुस्तक निकै चर्चित बनेको थियो । उक्त पुस्तकमा उनले गरेका जीवन संघर्षका पाटाहरुलाई समेटिएको छ ।