सिड्नी– श्रीमान श्रीमतीबीचको झगडाले उग्ररुप लिँदा अस्ट्रेलियाको सिड्नीमा एक जनाको मृत्यु भएको छ ।

नेपाली दम्पत्तीबीचको पारिवारिक विवादका क्रममा बुटवलका सन्तोष गौतमको हत्या भएको हो । हत्यामा संलग्न रहेको आरोपमा उनकै श्रीमती ३४ वर्षकी निमा गौतमलाई प्रहरीले नियन्त्रणमा लिएको छ ।

उनीहरु सिड्नीस्थित ग्रानभिलमा बस्दै आएका थिए । केहिसमय अघिदेखि पारिवारिक रुपमा खटपटमा रहेका उनीहरुबीच परिस्थिति बिग्रँदै जाँदा हात हालाहालको स्थिति भएको थियो ।

जसले एकको ज्यानै गएको छ । एनएसडब्लु प्रहरीका अनुसार शनिबार बेलुका ग्रानभिलको घरमा झगडा भएपछि घाईते भएका ३४ बर्षका युवालाई पारामेडिक्सले स्थानीय वेष्टमिड अस्पताल पुर्‍याएका थिए । उनको उपचारका क्रममा मृत्यु भएको हो ।

घाइते अवस्थामा रहेकी श्रीमतीलाई पनि उपचार गराएर ग्रानभिल प्रहरी चौकीमा उपस्थित गराइएको थियो ।

स्थानीय प्रहरीले यस घटनालाई घरेलु हिंसाको रुपमा अनुसन्धान गरिरहेको छ । घटना पछि गौतमलाई स्थानीय पारामाटा अदालतमा उपस्थित गराउने तयारी छ ।

उनीमाथी व्यक्ति हत्याको मुद्दा दायर गर्ने तयारी प्रहरीले गरेको छ ।