गुवाहाटी- भारतमा रहेको एन्फा—२१ टोलीले ‘डाक्टर टी आओ’ अन्तर्राष्ट्रिय फुटबल च्याम्यिनसिप अन्तर्गत शनिबार भएको खेलमा जित हात पार्दै ६ अंकका साथ सेमिफाइलनको यात्रा सहज बनाएको छ ।

पहिलो खेलमा मेघालयसँग पराजित  नेपाली टोलीले त्यसपछिका दुई खेलमा लगातार जित हात पार्दै अंक तालिकामा ६ अंक बनाएको हो । शनिबार भएको मणिपुरविरुद्धको खेलमा नेपाल ३–१ गोल अन्तरले विजयी भयो ।

एसएआइ स्टेडियममा भएको खेलमा नेपालको जितका लागि खेलको १९ औं मिनेटमा  अभिषेक रिजालले खाता खोले । त्यस्तै खेलको ३० औं मिनेटमा अभिषेकले व्यक्तिगत दोस्रो गोल गर्दै खेल २–० को स्थितिमा पुर्‍याए ।

पहिलो हाफ २–० ले अगाडि रहेको नेपालले दोस्रो हाफमा एक गोल गर्दै ३–१ को जित निकालेको हो । खेलको ५४ मिनेटमा मणिपुरका लागि सोङ्पु सिंगितले एक गोल फर्काएका थिए ।

निकै नै रोमाञ्चक बनेको खेलमा ७८ औं मिनेटमा नेपालले पाएको पेनाल्टीको सदुपयोग गर्दै अभिषकले बललाई जाली चुमाउँदै ह्याट्रिक पुरा गरे । खेलको म्यानअफदि म्याच पनि अभिषेक नै बने ।

शनिबारको खेलमा जित हात पारेपछि टोलीका मुख्य प्रशिक्षक चेत नारायण श्रेष्ठले भने,’ ‘मणिपुरविरुद्धको खेलमा जित हात पारेसँगै नेपाली टोलीमा थप हौसला मिलेको छ, आगामी खेलमा पनि जित हात पार्दै उपाधि चुम्नेछौं ।’

पहिलो खेलमा मेघालयसँग ३-२ ले पराजित भएको नेपाल दोस्रो खेलमा त्रिपुराविरुद्ध ८-० ले विजयी भएको थियो ।