नयाँ दिल्ली– भारतको राष्ट्रिय ध्वजावाहक विमान कम्पनी एयर इन्डियाका जहाजलाई दक्षिण भारतका ६ वटा विमानस्थलमा इन्धन भर्न रोक लगाइएको छ ।

आयल मार्केटिङ कम्पनी (ओएमसी)ले एयर इन्डियालाई इन्धन उपलब्ध गराउन बन्द गरेको हो । एयर इन्डियाले यसअघिको बक्यौता नतिरेका कारण यी ६ एयरपोर्टमा तल भर्न नदिने निर्णय गरिएको ओएमसीले जनाएको छ ।

बिहीबार अपराह्न ४ बदेतिर एयर इन्डियालाई इन्धन उपलब्ध गराउन नसकिने जानकारी आएको स्रोतलाई उल्लेख गर्दै टाइम्स अफ् इन्डियाले जनाएको छ ।

ओएमसीले एयर इन्डियालाई कोची, पुणे, पटना, राँची, बिशाखापत्तनम र मोहाली विमानस्थलमा इन्धन उपलब्ध नगराइने जानकारी दिएको हो ।

एयर इन्डियाका अधिकारीहरुले समस्या समाधानका लागि ओएमसीसँग वार्ता चलिरहेको बताएका छन् । ओएमसीलाई तिर्नुपर्ने मध्ये ६० करोड (भारु) हालै भुक्तान गरिएको पनि एयर इन्डियाका अधिकारीहरुको भनाइ छ ।

तत्कालका लागि एयर इन्डियाले यी ६ विमानस्थलमा उडान भर्ने आफ्ना जहाजहरुलाई अन्य विमानस्थलबाट पर्याप्त इन्धन भरेर जाने भनेको छ ।