काठमाडौं– क्यारेबियन टोली वेष्ट इन्डिजका भेट्रान खेलाडी सुनिल नारान र किरोन पोलार्ड भारतविरुद्धको अन्तर्राष्ट्रिय टि–२० को टिममा अटाएका छन् । सोमबार क्यारेबियन १४ सदस्यीय टोलीको घोषणा भएको थियो ।

इंग्ल्याण्ड र वेल्समा सम्पन्न विश्वकप क्रिकेटका क्रममा टोली बाहिर रहेका यी खेलाडी भारतविरुद्धको खेलका लागि टोलीमा अटाएका हुन् ।

यस्तै, विश्वकपका क्रममा चोटग्रस्त भइ बिचैमा विश्वकपबाट बाहिरिएका युवा अल राउण्डर आन्द्रे रसेल पनि १४ सदस्यीय टोलीमा अटाएका छन् ।

नारान सन् २०१७ पछि पहिलो पटक टि–२० टोलीमा अटाएका हुन् । यस्तै, पोलार्ड २०१८ मा भारत टुरमा क्यारेबियन टोलीमा रहेपनि त्यसयता टिमबाहिर रहेका थिए ।

वेष्ट इन्डिजले कार्लोस ब्रेथवेटको कप्तानीमा टोलीको घोषणा गरेको छ । भातर र वेष्ट इन्डिजबीचको टि–२० शृङ्खला अगस्ट ३ देखि शुरु हुने तालिका रहेको छ ।