लखनउ– भारतीय आम निर्वाचनमा सबैभन्दा महत्वपूर्ण राज्य उत्तर प्रदेशमा कांग्रेस पार्टीलाई नराम्रो धक्का लाग्ने देखिएको छ ।

निर्वाचनको मतगणना जारी रहँदा कांग्रेस पार्टीका दुई सबैभन्दा महत्वपूर्ण नेताहरु पार्टी प्रमुख राहुल गान्धी मतगणनामा निकै पछि परेको तथा अर्की प्रभावशाली नेतृ एवं कांग्रेस पार्टीकी पूर्व प्रमुख सोनिया गान्धीको अग्रता निकै नै कम रहेको भारतीय सञ्चार माध्यमले जनाएका छन् ।

उत्तर प्रदेशको अमेठीमा राहुल गान्धी भारतीय जनता पार्टी भाजपाकी नेतृ स्मृति इरानभन्दा पछि परेको जनाइएको छ ।

राहुल गान्धीले २८ हजार ३ सय ७७ तथा इरानीले ३४ हजार ६ सय ६७ मत प्राप्त गरेका छन् ।

त्यस्तै, राय बरेली निर्वाचन क्षेत्रमा पनि सोनिया गान्धीको अग्रता कम हुँदै गएको जनाइएको छ ।

यद्यपि दक्षिण भारतको केरलास्थित वायनाडमा भने राहुल गान्धीको अग्रता निकै नै धेरै रहेकाले उनको लोकसभामा प्रतिनिधित्व भने सुरक्षित नै देखिएको छ ।

अघिल्लो निर्वाचनमा कांग्रेसले उत्तर प्रदेशको अमेठी र रायबरेलीमा मात्र जितेको थियो ।

यसअघि अघिल्लो निर्वाचनमा अमेठीमा राहुल गान्धीले इरानीलाई १ लाख भन्दा धेरै मत अन्तरले पराजित गरेका थिए ।