काठमाडौं– अख्तियार दुरुपयोग अनुसन्धान आयोगले गलत मनसाय राखी एउटा व्यक्तिको जग्गा अर्कैको नाममा पास गराएको अभियोगमा मालपोत कार्यालय धरानका तत्कालीन मालपोत अधिकृतसहित पाँच जनाविरुद्ध विशेष अदालतमा मुद्दा दायर गरेको छ ।

आयोगका अनुसार मालपोत कार्यालय धरानका तत्कालीन मालपोत अधिकृत फणिन्द्र भट्टराई, तत्कालीन नायब सुब्बा डिल्लीराम कोइराला, तत्कालीन सर्वेक्षक योगेन्द्रप्रसाद यादव, तत्कालीन खरिदार श्यामप्रसाद लो र धरान– १४ का कर्णबहादुर राईविरुद्ध विशेष अदालतमा मुद्दा दायर गरिएको हो । फिल्डबुकमा खगेन्द्र कुमारीको जग्गा भनी उल्लेख भएको जिल्ला सुनसरी, धरान नगरपालिका– ११ ग को कित्ता नं ३५ र ३६ का जग्गा खगेन्द्रकुमारी गिरीको मृत्युपश्चात् गलत मनसायले खगेन्द्रकुमारी राई बनाई नामसारी गरी बिक्री गरेको पाइएको आयोगले जनाएको छ । सो कार्यमा मालपोतका तत्कालीन अधिकृतसहित पाँच जनाविरुद्ध मुद्दा दायर गरेको छ ।

यस्तै डिभिजन वन कार्यालय बाराका कार्यालय प्रमुख गौरीशङ्कर प्रसाद केसरी समेतले सेवाग्राहीसँग रु ९० हजार घुस मागेको अभियोगमा विशेष अदालतमा मुद्दा दायर गरेको छ । वन अधिकृत शिवशङ्कर ठाकुर लोहारको निर्देशनमा रु ९० हजार घुस लिएको पाइएको छ । यस्तै दैलेख नारायण नगरपालिकाको एक सिँचाइ आयोजनामा अनियमितता गरेको अभियोगमा जिल्ला प्राविधिक कार्यालय, दैलेखका सवइञ्जिनीयर टेकबहादुर हितान, बैंक सियाला सिँचाइ योजनाका अध्यक्ष मिनबहादुर रावललगायतका पदाधिकारीविरुद्ध विशेष अदालतमा मुद्दा दायर गरेको आयोगका प्रवक्ता प्रदीपकुमार कोइरालाले जानकारी दिए ।