नेपालगञ्ज– नेपाली सेनाको त्रिभुवन आर्मी क्लब आठौं राष्ट्रिय खेलकुद प्रतियोगिताअन्तर्गत पुरुष फुटबलको फाइनलमा प्रवेश गरेको छ ।

मंगलबार बिहान नेपालगञ्ज रंगशालामा भएको सेमिफाइनलको पेनाल्टी शूटआउटमा प्रदेश नम्बर ५ लाई ३–१ ले हराउँदै आर्मी फाइनल प्रवेश गरेको हो ।

निर्धारित ९० मिनेटको खेल २–२ गोलको बराबरीमा सकिएपछि खेल नतिजाका लागि पेनाल्टी शूटआउटमा गएको थियो ।

९० मिनेटको खेलको पहिलो हाफमै त्रिभुवन आर्मीले २–० ले अग्रता लिएको थियो । प्रदेश नम्बर ५ का दिपेन्द्रसिंह ठकुरीले आफ्नै गोलपोस्टमा गोल गरेपछि आर्मीले १–० ले अग्रता लिएको थियो । त्यसपछि खेलको ३३ मिनेटमा आर्मीका दिप लामाले गोल गरेर आर्मीलाई २–० को अग्रता दिलाए ।

प्रदेश नम्बर ५ का विनोद केसीले दोस्रो हाफमा प्राप्त २ ओटा पेनाल्टीको अवसरलाई गोलमा परिणत गरेपछि खेल बराबरीमा सकिएको थियो ।

पेनाल्टी शूटआउटमा नेपाली सेनाका नवयुग श्रेष्ठ, सन्तोष तामाङ र विवेक बस्नेतले १–१ गोल गरे । आर्मीका जितेन्द्र कार्की र दीपक गुरुङले गोल गर्न सकेनन् ।

प्रदेश नम्बर ५ का कृष्ण बस्नेतले मात्रै पेनाल्टीमा गोल गर्न सके । दिपेनसिंह ठकुरी, चेतन चौधरी र विवेक पुनले पेनाल्टीमा गोल गर्ने अवसर गुमाए ।

पुरुष फुटबलको फाइनल खेल बुधबार हुने छ । मंगलबार साँझ हुने अर्को सेमिफाइनल खेलका विजेता र त्रिभुवन आर्मीबीच बुधबार फाइनलमा भिडन्त हुने छ ।

मंगलबार साँझ फाइनल प्रवेशका लागि विभागीय टोली नेपाल पुलिस र सशस्त्र प्रहरीको एपीएफबीच प्रतिस्पर्धा हुने छ ।