सिड्नी– नेपालका कारागारमा बनेका बाँसका मुढा अष्ट्रेलियामा बेचिने भएका छन् । नेपाली कारागारमा कैदीहरुले बनाएको बाँसको मुढाले अष्ट्रेलियाको बजार पाएको हो । अष्ट्रेलियास्थित कथा प्राइभेट लिमिटेडले नेपाली कारागारमा बनेका मुढालाई अष्ट्रेलियाको बजारमा ल्याएको हो ।

शनिवार अष्ट्रेलियामा कथा प्राइभेट लिमिटेडले पत्रकार सम्मेलन गरी मुढालाई अष्ट्रलियाको बजारमा बजारीकरण गरेको जनाएको छ ।

सिड्नी शहरमा आयोजित पत्रकार सम्मेलनमा कथा प्राइभेट लिमिटेडका निर्देशक अरुण ढकालले शुरुको चरणमा नेपालबाट २५ वटा मुढाहरु आयात गरिएको जनाए ।

कार्यक्रममा अन्तर्राष्ट्रिय झापाली समाजका अध्यक्ष दिनेश पोखरेलले नेपालमा बनेका समानको अष्ट्रेलियामा बजारीकरण हुनु राम्रो भएको भन्दै यसले नेपालमा रोजगारी सिर्जना गर्न मद्दत हुने समेत जनाए ।

नेपालबाट वैधानिक प्रक्रियाबाट आयातित मुढाहरु अष्ट्रेलियाको क्वारेन्टाईनबाट समेत परीक्षण गरिएको बताइएको छ । बाँस, पुराना टायर, प्लाष्टिकका डोरी लगायतका समान प्रयोग गरी उत्पादिन मुढाहरु गुणस्तरीय, टिकाऊ र आकर्षक तथा वातावरणमैत्री रहेको कथा प्राइभेट लिमिटेडको दाबी छ ।

ठूला, मध्यम र साना गरेर विभिन्न ३ वटा साईजमा उपलब्ध मुढाहरु कथाको वेभसाईट तथा मिन्टो स्थित नमस्ते मिन्टो ग्रोसरीबाट हाल उपलब्ध हुनेछन् ।

भविष्यमा विभिन्न नेपाली व्यापार व्यवसाय, कार्यक्रम, रेष्टुरेन्ट तथा क्याफेहरुसँग सहकार्य गरी नेपाली समानलाई थप प्रवद्र्धन र विस्तार गर्ने योजना भएको कथाले जनाएको छ ।