वीरगन्ज– खेतमा काम गर्न गएको बेला चट्याङ लागेर पर्सामा १ जनाको मृत्यु भएको छ ।

मृत्यु हुनेमा पर्साको बहादुरमाई नगरपालिका–२ बैरियाका ३५ वर्षी माधव राम छन् ।

पानी परेको बेला खेतमा काम गर्न निस्किएका राम चट्याङ लागेर गम्भीर घाइते भएका थिए ।

स्थानीयहरुले उद्दार गरी उपचारका लागि वीरगन्जस्थित वीरगन्ज हेल्थ केयरमा पठाएकोमा उपचारकै क्रममा रामको मृत्यु भएको जिल्ला प्रहरी कार्यालय पर्साले जनाएको छ ।

मृतक रामको शव परीक्षणका लागि नारायणी अस्पताल वीरगन्जमा पठाइएको प्रहरीले जनाएको छ ।

यस्तै, पर्साको वीरगन्जमा करेन्ट लागेर १ युवतीको मृत्यु भएको छ । मृत्यु हुनेमा पर्साको छिपहरमाई गाउँपालिका–२ घर भएकी २४ वर्षीया अनिता देबी छन् ।

वीरगन्जस्थित आफ्नै कोठामा करेन्ट लागेर घाइते भएकी अनिताको उपचारका क्रममा नारायणी अस्पतालमा मृत्यु भएको प्रहरीले जनाएको छ ।