काठमाडौं– सरकारले संसदमा पेश गरेको सूचना तथा प्रविधि विधेयकमाथि शुक्रवारदेखि सैद्धान्तिक छलफल शुरु भएको छ ।

छलफलमा सहभागी हुँदै नेकपा सांसद नवराज सिलवालले सूचना प्रविधि विधेयक समयसापेक्ष रहेको बताए । उनले एक्काइसौँ सताब्दीसापेक्ष विधेयक आएको दाबी गरे ।

संविधानले व्यवस्था गरेको वैयक्तिक स्वतन्त्रताको ग्यारेण्टी गरेको भएपनि युवापुस्तामाथि सामाजिक सञ्जालका कारण परेको समस्या समाधानका लागि विधेयक महत्वपुर्ण हुने उनले बताए ।

तर कांग्रेस सांसद पुष्पा भुसालले संविधानले व्यवस्था गरेको स्वतन्त्रताको हकलाई समेत कुण्ठित पार्ने हिसाबले संविधानले व्यवस्था गरेको गोपनियताको हकभन्दा पनि बाहिर गएर विधेयक संसदमा ल्याइएको बताइन् ।

उनले सामाजिक सञ्जाललाई दर्ता गर्ने विषय समेत विधेयकमा आएको भन्दै दर्ता गर्ने व्यवस्था हटाएर अभिलेखिकरण गर्ने व्यवस्था राख्न माग गरिन् । प्रजातन्त्रमा अभिव्यक्ति स्वतन्त्रता महत्वपुर्ण रहेको भन्दै संविधान र मौलिक हकसँग बाझिने गरी ल्याइएको विधेयक संसोधन गर्नुपर्ने उनको भनाइ थियो ।