काठमाडौं– नेपाल कम्युनिष्ट पार्टी नेकपाले सांगठनिक एकीकरणको लागि सुझाव दिन गठन गरेको कार्यदल भंग गरेको छ ।

शुक्रवार(आज) बालुवाटारमा बसेको सचिवालय बैठकले कार्यदल भंग गर्ने निर्णय गरेको प्रवक्ता नायारणकाजी श्रेष्ठले बताए ।

पार्टी एकताको बाँकी काम सचिवालयले गर्ने र त्यसलाई स्थायी समितिबाट अनुमोदन गराउने निर्णय भएको नेता श्रेष्ठले जानकारी दिए ।

‘कार्यदलमा भएको कामको विवरण पेश गरिसकेपछि अहिलेसम्म गरेको कामका लागि धन्यवाद दिने निर्णय गर्यो‍’ बैठकपछि प्रवक्ता श्रेष्ठले भने,’अब प्रस्ताव सचिवालयले नै तयार गर्ने र सांगठनिक एकीकरणको लागि तयार भएको प्रस्ताव स्थायी समितिमा पेश गर्ने निर्णय गरेको छ ।’

विहीबार बसेको सचिवालय र कार्यदलको संयुक्त बैठकमा कार्यदलका सदस्यहरुले एक साताको लागि कार्यदलको म्याद थप गर्न माग गरेका थिए । तर पार्टी अध्यक्ष केपी ओली कार्यदलको म्याद थप नगर्ने पक्षमा देखिएका थिए ।

सचिवालयमा माधवकुमार नेपाल, झलनाथ खनाल, वामदेव गौतमलगायतका नेताहरु कार्यदललाई एक साताको थप समय दिनुपर्ने पक्षमा थिए तर उनीहरुको फरक मतका बाबजुद सचिवालय सदस्य रामबहादुर थापाको संयोजकत्वमा पुस १२ गने गठन भएको कार्यदल भंग भएको हो । एकताको बाँकी काम अब सचिवालयले नै गर्ने छ ।