काबुल– अफगानिस्तानमा दुई अमेरिकी सैनिक मारिएका छन् । अमेरिका नेतृत्वको अन्तर्राष्ट्रिय गठबन्धनका सेनामा आबद्ध दुई अमेरिकी सैनिक भीडन्तमा मारिएको पेन्टागनले जनाएको छ ।

मारिनेहरुको विवरण तथा कुन अवस्थामा उनीहरु मारिएका हुन् भन्ने खुलाइएको छैन । उनीहरु गोली लागेर मारिएको बताइएपनि कहाँ र कहिले उनीहरुको ज्यान गएको भन्नेबारे स्पष्ट पारिएको छैन ।

यद्यपि अमेरिकी सञ्चारमाध्यमले उनीहरु अफगानिस्तानको उत्तरी फर्यब प्रान्तमा तालिबानसँगको भीडन्तमा मारिएको हुनसक्ने बताएका छन् । तालिबान तथा सुरक्षा फौजबीच भएको भीडन्तमा अरु तीन अफगान सुरक्षाकर्मी घाइते भएको बताइएको छ ।

अमेरिका र तालिबानबीचको शान्ति वार्ता अघि बढ्न सक्ने सम्भावना कायमै रहेको अमेरिकी भनाइ सार्वजनिक भएको भोलिपल्ट अफगानिस्तानमा अमेरिकी सैनिक मारिएका हुन् ।

यसअघि अफगानिस्तानका लागि अमेरिकी शान्ति प्रतिनिधि जल्मेय खालिदजादले तालिबानसँग वार्ता गर्नका लागि आफू कतारको राजधानी दोहा जान लागेको बताएका थिए ।