काठमाडौं– आजबाट साउन महिनाको सोमबारे व्रत शुरु भएको छ । आज पहिलो सोमबारको व्रत देशभरका शिवालयमा जल चढाउने र पूजा गर्नेहरुको बिहानैदेखि घुइँचो छ ।

कल्याणकारी देवता मानिने शिवलाई दूध र जल अभिषेक गरेर भक्तिपूर्वक पूजा गरेमा मनोकांक्षा पूरा हुने धार्मिक विश्वास रहेको छ ।

साउनको सोमबारलाई अत्यन्त शुभ मानिन्छ । यस वर्षको साउन महिनामा चार सोमबार परेका छन् । हरेक सोमबार व्रत बसेर महिला र पुरुषहरुले शिवको भक्तिपूर्वक पूजा गर्छन् ।

हरियो, पहेंलो र रातो पहिरनमा सजिएका व्रतालुको घुइँचो काठमाडौंको पशुपति, भक्तपुरको डोलेश्वर, ललितपुरको कुम्भेश्वर र चितवनको देवघाट, खोटाङको हलेसीलगायतका शिव मन्दिरमा देख्न सकिन्छ ।

गेरु वस्त्रधारी बोलबम यात्रीहरुको पनि शिवालयहरुमा उल्लेख्य संख्या हुन्छ । बोलबम यात्रीहरुले काठमाडौंको सुन्दरीजलबाट शुद्ध जल पैदल हिँडेर ल्याई पशुपतिमा चढाउने गर्दछन् ।

पशुतिनाथमा व्रतालुहरुको बिहानैदेखि भिड रह्यो । पशुपतिनाथमा पूजाका लागि पुगेका व्रतालुहरुका केही तस्बिर हेरौँ ।

तस्वीर- अदीप श्रेष्ठ