काठमाडौं – भारतीय टेलिभिजन जी टिभीको रियालिटी शो ‘सारेगमा लिल च्याम्स २०१९’ को ग्राण्ड फिनालेमा पुग्न सफल नेपाली बालगायक प्रितम आचार्य र आयुष केसीले प्रधानमन्त्रीसँग भेट गरेका छन् ।

रियालिटी शो मा तेस्रो भएका प्रितम आचार्य र चौथो बनेका सिन्धुपाल्चोकका आयुष केसीले प्रधानमन्त्री केपी शर्मा ओलीलाई बालुवाटार पुगेर भेटेका हुन् । उनीहरुले प्रधानमन्त्रीलाई गीत सुनाएका थिए भने आफ्नो सफलताको कथा पनि सुनाउन भ्याए ।

प्रितम र आयुषले भक्तराज आचार्यको गीत ‘जहाँ छन् बुद्धका आँखा’ लगायत केही गीत सुनाएका थिए । आयुष र प्रितमलाई प्रधानमन्त्री पत्नी राधिका शाक्य आफैले खाजा बनाएर खुवाएकी थिइन् ।

आइतबार सुरशाला म्युजिक एकेडेमीले यी दुईलाई सम्मान समेत गरेको थियो । उनीहरुलाई गायक रामकृष्ण ढकाल, उद्यमी उपेन्द्र महतो, सुरशाला संस्थापक अमृत क्षेत्री लगायतले सम्मान गरेका थिए । सम्मान कार्यक्रममा पनि आयुष र प्रितमले गीत सुनाएका थिए ।