विराटनगर– पाठेघरसम्बन्धी बिरामी महिलाको उपचारको क्रममा शनिवार मृत्यु भएपछि विराटनगर–२ मुनालपथस्थित विराट नर्सिङहोम तनावग्रस्त भएको छ ।

मोरङको सुन्दरहरैचा नगरपालिका विराटचौक घरभएकी ३८ वर्षीया चेलीमाया भनिने प्रिती कोइरालाको उपचारको क्रममा मृत्यु भएपछि चिकित्सकले लापरवाही गरेको आरोप लगाउँदै मृतकका आफन्तले नर्सिङहोमको गेटमा ताला लगाउनुका साथै सामान्य तोफोडसमेत गरेका छन् । जिल्ला प्रहरी कार्यालय मोरङबाट खटिएको प्रहरीको टोलीले नर्सिङहोममा सुरक्षा दिनुका साथै लगाइएको ताला खोलेको छ ।

नर्सिङहोम प्रशासनले सङ्क्रमणका कारण बिरामीको मृत्यु भएको हो र यसमा चिकित्सकको कुनै लापरवाही नरहेको जनाएको छ । जिल्ला प्रहरी कार्यालय मोरङका प्रवक्ता प्रहरी नायब उपरीक्षक घनश्याम श्रेष्ठले अहिले स्थिति सामान्य रहेको र दुवै पक्षबीच वार्ताको तयारी भइरहेको जानकारी दिए। बिरामीको उपचारको करीब २८ घण्टापछि कोइरालाको मृत्यु भएको थियो ।

चिकित्सकको लापरवाहीले बिरामीको मृत्यु भएको विरोधमा विराटनगर–धरान सडकखण्डमा टायर बालेर अवरुद्ध गर्न खोज्ने पाँच जनालाई प्रहरीले पक्राउ गरेको छ ।