अमेरिका– अमेरिकाले चिनियाँ प्राविधिक कम्पनी हुवावेलाई जस्तै अर्को चिनियाँ प्राविधिक कम्पनीलाई पनि कालोसूचीमा राख्ने तयारी गरिरहेको अमेरिकी सञ्चारमाध्यमले जनाएका छन् ।

अमेरिकी सञ्चारमाध्यमका अनुसार अमेरिकाले चिनियाँ भिडियो सर्भिलान्स कम्पनी हाइकभिजनलाई पनि कालोसूचीमा राख्ने तयारी गरिरहेको हो । यसअनुसार अमेरिकी कम्पनीले हाइकभिजनसँग कारोबार गर्न सरकारको अनुमति चाहिनेछ ।

यसअघि अमेरिकाले हुवावेलाई कालोसूचीमा राखेपछि अमेरिकी इन्टरनेट कम्पनी गुगलले हुवावेसँग कारोबार नगर्ने घोषणा गरिसकेको छ ।
त्यसबाहेक हालै बेलायतका दुई दूरसञ्चारकम्पनीहरु ईई र भोडाफोनले हुवावेको पाचौं पुस्ताको फाइभजी मोबाइल इन्टरनेट सेवा उपलब्ध नगराउने घोषणा गरिसकेका छन् ।

हाइकभिजनले क्लोज सर्किट क्यामेरा सीसीटीभी तथा थर्मल र ट्राफिक क्यामेराको निर्माण गर्ने गरेको छ । हाइकभिजनका उपकरणबाट मानिसहरुको गोपनियताको अधिकार हनन हुने तथा गोप्य जानकारी चीन सरकारको नियन्त्रणमा जानसक्ने भन्दै यसअघि पनि प्रश्न उठ्दै आएको थियो ।