काठमाडौं- नेपाल राष्ट्र बैंकले चालू आर्थिक वर्षको ९ महिनामा ६ खर्ब ५३ अर्ब १९ करोड रुपैयाँ बराबरको रेमिट्यान्स भित्रिएको जनाएको छ । वैदेशिक रोजगारीमा गएका कामदारले ९ महिनाको अवधिमा सो बराबरकाे रकम नेपाल पठाएका हुन् ।

गत आर्थिक वर्षको तुलनामा चालू आवको नौ महिनामा २०.९ प्रतिशतले विदेशबाट भित्रिएको रेमिट्यान्स बढेको नेपाल राष्ट्र बैंकले जनाएको छ । अघिल्लो वर्षको सोही अवधिमा अवधिमा रेमिट्यान्स ५.६ प्रतिशतले बढेको थियो । अमेरिकी डलरको मूल्य वृद्धि हुदाँ विप्रेषण आप्रवाह २०.९ प्रतिशतले वृद्धि भएको नेपाल राष्ट्र बैंकले हालै सार्वजानिक गरेको वित्तीय विवरणमा उल्लेख छ ।

अन्तिम श्रम स्वीकृति संस्थागत तथा व्यक्तिगतका आधारमा वैदेशिक रोजगारीमा जाने नेपालीको संख्या समीक्षा अवधिमा ३९ प्रतिशतले घटेको राष्ट्र बैंकले उल्लेख गरेको छ । रोजगारीमा जाने कामदारको संख्या घटेपनि रेमिट्यान्समा भने असर नपरहेको बैंकले जनाएको छ ।