इण्डोनेशिया– इण्डोनेशियामा हालै भएको निर्वाचनको परिणाम बाहिरिएसँगै शुरु भएको हिंसामा परी कम्तीमा ६ जनाको ज्यान गएको छ ।

गत अप्रिल १७ मा भएको निर्वाचनको नतिजा बाहिरिएसँगै इण्डोनेशियामा हिंसा मच्चेको हो । नतिजामा वर्तमान राष्ट्रपति जोको ‘जोकोवी’ विदोदो विजयी भएको जनाइएपछि उनका प्रतिद्वन्द्वी प्राबोवो सुबियान्तोका समर्थकले धाँधली भएको भन्दै राजधानी जकर्तामा प्रदर्शन गरेका थिए ।

प्रदर्शनका क्रममा उनीहरुले पेट्रोल बम, ढुङ्गामुढा प्रहार गरी ठाउँठाउँमा आगजनी गरेका थिए । जवाफमा प्रहरीले अश्रुग्याँस, रबरको गोली तथा पानीको फोहोरा प्रहार गरेको थियो ।

मंगलबार रातिबाट शुरु भएको यो झडप ५ घण्टासम्म जारी रहेको जनाइएको छ ।

झडपमा अन्य २ सय जना भन्दा धेरै घाइते भएको अन्तर्राष्ट्रिय सञ्चारमाध्यमले जनाएका छन् ।

मतपरिणाम अनुसार राष्ट्रपति विदोदोले ५५.५ प्रतिशत मत प्राप्त गरेका छन् भने उनका निकटतम प्रतिद्वन्द्वी सुबियान्तोले ४४.५ प्रतिशत मत प्राप्त गरेका छन् ।

निर्वाचनको परिणाम बाहिरिएपनि सुबियान्तोले निर्वाचन आयोगको औपचारिक कागजातमा हस्ताक्षर गर्न मानेका थिएनन् । उनले मुलुकका पाँच प्रान्तमा भएका मतदानमा धाँधली भएको भन्दै पुनः मतदान गराउनुपर्ने अडान लिएका छन् ।