उत्तर कोरिया– उत्तर कोरियाली सर्वोच्च नेता किम जोङ उन रुसी राष्ट्रपति भ्लादिमिर पुटिनसँगको भेटवार्ताका लागि रुसको सुदूर पूर्वको भ्रमणमा जाने भएका छन् ।

जापानको क्योदो समाचार संस्थाले जनाएअनुसार सर्वोच्च नेता किमले आगामी बुधबार रेलमार्गबाट सुदूर पूर्वी रुसको भ्लादिभोस्तोका शहर जानेछन् ।

किम र पुटिनबीच भ्लादिभोस्तोकशहरको तटपारी रहेको रुस्की टापुमा भेटवार्ता हुनेछ । दुई नेताबीच आगामी बिहीबार भेटवार्ता हुने अन्तर्राष्ट्रिय सञ्चारमाध्यमले जनाएका छन् ।

सन् २०११ मा तत्कालिन उत्तर कोरियाली शासक तथा वर्तमान सर्वोच्च नेता किम जोङ उनका बाबु किम जोङ इलले रुसको भ्रमण गरी तत्कालिन रुसी राष्ट्रपति दिमित्री मेद्भेदेवसँग भेटवार्ता गरेयता उत्तर कोरियाली शासकले रुसको भ्रमण गर्न लागेको यो पहिलो पटक हो ।

रुस र उत्तर कोरियाबीच शीतयुद्धकै समयदेखि सुमधुर सम्बन्ध रहँदै आएको बताइन्छ ।