काठमाडौं– उपचार गर्ने आर्थिक स्रोत नहुँदा साढे दुई वर्षदेखि क्यान्सर रोगबाट पीठित रहेकी मोरङकी मन्दिरा गुरुङको उपचार हुने भएको छ ।
साढे दुईवर्ष अघि स्तन क्यान्सर भएपनि रकम अभावमा उपचार नगराइ बसेकी गुरुङलाई उपचारको लागि काठमाडौं ल्याइएको थियो ।
गुरुङलाई ललितपुरको नेपाल क्यान्सर हस्पिटल एण्ड रिसर्च सेन्टरमा भर्ना गरिएको छ । गुरुङको आज (सोमबार) क्यान्सर भएको देव्रे स्तनको शल्यक्रिया गरेर उपचार गर्न लागिएको अस्पतालका स्तन क्यान्सर रोग विशेषज्ञ डाक्टर कपेन्द्र शंकर अमात्यले बताए ।
‘उहाँको क्यान्सर तेस्रो स्टेजमा पुगेको छ । क्यान्सर भएको स्तनमा घाउ समेत भएकाले स्तन काटेर फाल्नुपर्छ,’ डा अमात्यले खबरहबसँग भने ‘अप्रेसनको लागि बिरामीलाई अप्रेसन थिएटरमा लगिसकेका छौं, अब केही समयमै अप्रेसन हुन्छ ।’
गुरुङको उपचारको लागि ९ महिना समय लाग्ने डा अमात्यले बताए ।
गुरुङको क्यान्सरको उपचारका लागि ९ महिनासम्म अस्पतालम अस्पतालमा लाग्ने सम्पूर्ण खर्च अस्पतालले निशुल्क गरेको छ । डा अमात्यका अनुसार ९ महिनासम्म तेस्रो स्टेजको क्यान्सरका बिरामीको लागि करिब ७ लाख खर्च लाग्ने गर्छ ।
गुरुङलाई मोरङका युवा विरेन्द्र कुमार साहले उपचारका लागि काठमाडौं ल्याएका हुन् ।
परिवारको आर्थिक अवस्था कमजोर हुँदा साढे दुईवर्षसम्म रोग पालेर घरमै बसेकी गुरुङ क्यान्सरको उपचार गर्न पाउँदा खुसी भएकी छन् ।
उनले खबरहबसँग भनिन्, ‘सबैले मिलेर मलाई अस्पतालसम्म ल्याउनुभयो, निशुल्क उपचार गराउँदै हुनुहुन्छ म धेरै खुसी छु अब चाँहि बाँच्छु कि भन्ने आसा पलाएको छ।’
यो पनि पढ्नुस् :
प्रतिक्रिया