एजेन्सी– अर्जेन्टिनाका कप्तान लियोन मेस्सी तथा पोर्चुगलका कप्तान क्रिष्टियानो रोनाल्डो जुलाई पछि पहिलो पटक राष्ट्रिय टोलीमा फर्किएका छन् ।

शनिबार बिहान भेनेजुयलाविरुद्धको अन्तराष्ट्रिय मैत्रिपूर्ण खेलमा कप्तान मेस्सी मैदान उत्रिनेछन् । यस्तै, पोर्चुगलका कप्तान रोनाल्डो युरोपा कप २०२० को छनोटमा यूक्रेनविरुद्ध मैदान उत्रिदैछन् ।

रसिया विश्वकपमा अर्जेन्टिना अन्तिम—१६ मा फ्रान्ससँग पराजित भएपछि राष्ट्रिय टोलीबाट खेलेका थिएनन् । त्यस्तै, रोनाल्डोपनि विश्वकप पछि राष्ट्रिय टोलीबाहिर रहेका थिए ।

रोनाल्डोबिनै नेसन्स लिग खेलेको पोर्चुुगल सेमिफाइनलसम्म पुगेको थियो । ३४ वर्षे रोनाल्डोले पोर्चुगलबाट खेलेका १ सय ५४ अन्तराष्ट्रिय खेलमा ८५ गोल गरेका छन् ।

यस्तै, ३१ वर्षे मेस्सीले अर्जेन्टिनाबाट खेलेका १सय२८ अन्तराष्ट्रिय खेलमा ६५ गोल गरेका थिए । मेस्सी टोलीमा फर्किएकोमा मुख्य प्रशिक्षक लियोनल स्कालोनीले खुसी व्यक्त गरेका छन् । “यो मेरा लागि र सबैका लागि खुसीको कुरा हो । विश्वकै महान खेलाडी टिममा रहँदा टिमबाट अपेक्षा पनि धेरै हुनेगर्छ,” प्रशिक्षक स्कालोनिले भने ।