काठमाडौं– पूर्वी चीनको याङ्चेङमा अवस्थित एक रसायनिक मल उद्योगमा विस्फोट हुँदा कम्तिमा ४४ जनाको ज्यान गएको छ । विस्फोटमा परी ६ सय ४० जना घाइते भएका चिनियाँ समाचार संस्था सिन्ह्वाले जनाएको छ ।

रसायनिक मल उत्पादन गर्ने उद्योगमा बिहीवार दिउँसो आगलागी भएपछि ठूलो विस्फोट भएको थियो । विस्फोट हुँदा भूकम्प मापन केन्द्रले २.२ म्याग्नेच्युटको कम्पन मापन गरेको समाचारमा जनाइएको छ ।

घाइतेभएका ६ सय ४० जनालाई अस्पताल भर्ना गरिएको छ । जसमध्ये ३३ जना गम्भीर रहेका जनाइएको छ ।

विस्फोटका क्रममा उद्योगका भवनहरु उछिट्टिएर त्यसका टुक्रा ३ किलोमिटर परसम्म पुगेका स्थानीय सञ्चारमाध्यमले उल्लेख गरेका छन् ।

उक्त विस्फोटले ३ किलोमिटर टाढा रहेको अर्को रसायनिक मलको उद्योगका छानामा समेत आगो लागेको जनाइएको छ ।

आगालागी शुरु भएको करिब १२ घन्टापछि आगो नियन्त्रणमा लिइएको थियो ।

बिहीवार भएको विस्फोट चिनियाँ औद्योगिक क्षेत्रमा हालैका वर्षमा भएका सबैभन्दा ठूलो विस्फोटमध्ये लिइएको छ । यसअघि सन् २०१५ को अगस्टमा यस्तै प्रकारको विस्फोट हुँदा चीनमा १ सय ६० जनाको मृत्यु भएको थियो भने १ हजार घाइते भएका थिए ।