काठमाडौं – काठमाडौंमा जारी सहिद स्मारक ए डिभिजन लिग फुटबलमा विभागीय टोली सशस्त्र प्रहरी बलको एपीएफ क्लब र हिमालयन क्लबसँग अंक बाँडेको छ ।

आइतबार दिउँसो भएको खेलमा एपीएफ र हिमालयनले १–१ गोलको बराबरी खेल्दै अंक बाडेका हुन् । त्रिपुरेश्वरस्थित रंगशालामा भएको खेलमा एपीएफ र हिमालयन क्लबले पहिलो हाफमा गोलरहित बराबरी खेलेका थिए ।

तर, खेलको ४७ औं मिनेटमा हिमालयन शेर्पाका त्रिदेव गुरुङले गोल गर्दै टिमलाई विभागीय क्लबविरुद्ध अग्रता दिलाएको थिए । त्यसको ठिक ११ मिनेटपछि एपीएफ क्लबका प्रविन कुमार स्याङ्तानले हिमालयन शेर्पाविरुद्ध बराबरी गोल फर्काए ।

स्याङ्तानले ५८ औं मिनेटमा गोल गरेका थिए । बराबरी खेलेको एपीएफले् अंक तालिकामा खाता खोलेको छ । एपीएफले दुई खेलबाट १ अंक बटुलेको छ भने हिमालयन शेर्पाले दुई खेल बराबरी खेल्दै २ अंक जोडेको छ ।

लिगमा सोमबार विभागीय टोली त्रिभुवन आर्मी क्लब र साविक विजेता मनाङ मर्स्याङ्दी क्लबबीचको खेल दिउँसो १२ बजे दशरथ रंगशालामा हुनेछ भने दोस्रो खेल पनि दशरथ रंगशाला थ्री स्टार क्लब र नेपाल पुलिस क्लबबीच दिउँसो ३ बजे हुनेछ ।