काठमाडौं– गृह मन्त्रालय मातहतको राष्ट्रिय विपद् जोखिम न्यूनीकरण तथा व्यवस्थापन प्राधिकरणको कार्यकारी प्रमुख पदका लागि ३ जनाको नाम सिफारिस भएको छ ।

प्राधिकरणको प्रमुख कार्यकारी पदका अन्तिम सूचीमा परेका ५ जनामध्ये अन्तिम ३ जनालाई छनौट गरी नियुक्तिका लागि मन्त्रिपरिषदमा सिफारिस गरिएको गृह मन्त्रालयले जानकारी दिएको छ ।

प्राधिकरणको कार्यकारी प्रमुखका लागि अन्तिम ३ मा पर्नेमा अनिल पोखरेल, डा. प्रेमबहादुर थापा र विष्णु प्रसाद खरेल छन् ।

प्राधिकरणको कार्यकारी प्रमुख नियुक्तिका लागि सिफारिस गर्न गठित समितिले दरखास्त आह्वान गरी अन्तिम उम्मेदवारका लागि ५ जनालाई छनौट गरेको थियो ।

जसमध्येबाट शैक्षिक योग्यता, अनुभव, तालिम, सोचपत्र एवम् व्यवसायिक कार्ययोजना मूल्याङ्कन, सोचपत्र तथा व्यवसायिक कार्ययोजनाको प्रस्तुतीकरण र अन्तर्वार्ताको मूल्याङ्कनमा प्राप्त गरेको अङ्कमा सबैभन्दा बढी अङ्क प्राप्त गर्ने ३ जनालाई नियुक्तिका सिफारिस गरिएको जनाइएको छ ।

जसअनुसार सबैभन्दा बढी अङ्क अनिल पोखरेलले प्राप्त गरेका छन् भने डा प्रेमबहादुर थापा र विष्णप्रसा खरेल क्रमश दोस्रो र तेस्रो नम्बरमा सिफारिस भएका छन् ।